كل يوم دراسة مذاكرة حضور محاضرات، انا اكتأبت خلاص

عندي امتحان ومفتحتش نص المنهج، انا مكتئب

خلصت الكلية ومش لاقي شغل، انا مكتئب

اتعلمت واشتغلت واتجوزت وبصرف على العيال .. وبرده مكتئب

يومياً لازم نقابل شخص أو اكتر بيقول "انا عندى اكتئاب"

تفتح الفيس تلاقى الكل مكتئب

تكلم صاحبك يقولك معلش اصل انا عندي اكتئاب 

 لكن هل ده مرض اكتئاب فعلاً ؟ 

معظمنا بيخلط بين الاكتئاب المرضى والاكتئاب العرضي الناتج عن الضغوط النفسية

الاول نعرف ايه هوا الاكتئاب :

الاكتئاب كمرض عبارة عن نقص فى مواد كيميائية زي مادة اسمها السيروتونين المسؤولة عن احساس الانسان بالسعادة والاستقرار النفسى وبالتالى بيحس المريض بالتشاؤم والسلبية مهما كانت كل الظروف المحيطة بيه إيجابية كمان بيفقد طاقاته الجسدية والنفسية بيحس انه مش عايز يعمل أي حاجة بيحس أنه أكبر من سنه بكتير بيكون عنده احساس دائم بالذنب ومع تطور الحالة ممكن يفكر في الانتحار 

كمان الاكتئاب بيأثر بشكل عضوي فى صورة :

- الأرق وقلة النوم أو كثرة الكوابيس وممكن يزيد النوم فى بعض الناس

- فقدان الشهية وقلة الوزن أو البعض بيزيد وزنهم مع الأكل بشراهة

سبب الاكتئاب مشكلة فى النواقل العصبية أو نقص هرمون معين ممكن يكون اكتئاب موسمي أو اكتئاب ما بعد الولادة 

وممكن تكون بدايته حزن شديد نتيجة فقدان عزيز أو ضغوط فوق طاقة الشخص لفترات طويلة .

الفرق بين الاكتئاب المرضي و الضغط النفسي :

 1- الضغط النفسي بيكون مرتبط بسبب معين زي وقت الامتحانات كتر الدراسة دوشة الشغل وهكذا وغالباً بتختفى الأعراض مع اختفاء السبب عكس الإكتئاب الذي قد يبدأ بدون أي سبب وفى حياة مثالية.

2- أعراض الاكتئاب شديدة بتأثر بشكل ملحوظ على حياتك و مستوى نشاطك وتفاعلك الإجتماعي زي ما قلنا وبتكون لمدة اسبوعين متواصلين على الأقل لكن فى حالة الضغط النفسي بتكون الأعراض أشد وطأة .

3- فى حالة الضغط النفسي الشخص بيحس بملل شديد من الشيء الذي ضغطه و بيحاول يهرب منه بأي شكل من الاشكال فى حين أن مريض الاكتئاب بيفقد الإحساس بأي شيء ممتع وبيكون مش عايز يعمل أي حاجة على الإطلاق.

  علاج الاكتئاب عايز موضوع لوحده بس اهم خطوة فيه هي اكتشافه وعدم اهماله والمتابعة مع طبيب نفسى الي بدوره هيحدد نوع وخطة العلاج الي هوا بعيد تماماً عن "اجمد شوية" و"انت اكيد بعيد عن ربنا" أو "كل الناس مكتئبة زيك" .

ـــــــــــــــــــــ

أما بالنسبة للحزن و الضغط النفسي بقى فا دي حاجة بايدك تقدر تتغلب عليها وتقدر انك تزودها 

لما تحس بضغط نفسي غير روتين حياتك اخرج اتفسح اقرا أو اسمع حاجة بتحبها - بس ارجوك بلاش اغاني كئيبة -

ممكن تاكل اكله بتحبها ممكن تعمل عمل تطوعي ممكن تزور ايتام وتفرحهم وتفرح معاهم

اهتم بالرياضة وليكن المشي نص ساعة تفرق كتير فى نفسيتك غير طبعاً الفوايد الصحية التانية 

لو مش عارف تعمل كده قرب من عيلتك واصحابك فضفض معاهم 

اما لو كل الي فوق دا مش نافع فممكن تكون الحالة اكتر من انها شوية ضغط .